| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 59.18 | Dem. 59.22 (English) | >>Dem. 59.25 |
59.21Λυσίας γὰρ ὁ σοφιστὴς Μετανείρας ὢν ἐραστής , ἐβουλήθη πρὸς τοῖς ἄλλοις ἀναλώμασιν οἷς ἀνήλισκεν εἰς αὐτὴν καὶ μυῆσαι , ἡγούμενος τὰ μὲν ἄλλα ἀναλώματα τὴν κεκτημένην αὐτὴν λαμβάνειν , ἃ δʼ ἂν εἰς τὴν ἑορτὴν καὶ τὰ μυστήρια ὑπὲρ αὐτῆς ἀναλώσῃ , πρὸς αὐτὴν τὴν ἄνθρωπον χάριν καταθήσεσθαι . ἐδεήθη οὖν τῆς Νικαρέτης ἐλθεῖν εἰς τὰ μυστήρια ἄγουσαν τὴν Μετάνειραν , ἵνα μυηθῇ , καὶ αὐτὸς ὑπέσχετο μυήσειν .
59.22ἀφικομένας δʼ αὐτὰς ὁ Λυσίας εἰς μὲν τὴν αὑτοῦ οἰκίαν οὐκ εἰσάγει , αἰσχυνόμενος τήν τε γυναῖκα ἣν εἶχε , Βραχύλλου μὲν θυγατέρα , ἀδελφιδῆν δὲ αὑτοῦ , καὶ τὴν μητέρα τὴν αὑτοῦ πρεσβυτέραν τε οὖσαν καὶ ἐν τῷ αὐτῷ διαιτωμένην · ὡς Φιλόστρατον δὲ τὸν Κολωνῆθεν , ᾔθεον ἔτι ὄντα καὶ φίλον αὐτῷ , καθίστησιν ὁ Λυσίας αὐτάς , τήν τε Μετάνειραν καὶ τὴν Νικαρέτην . συνηκολούθει δὲ καὶ Νέαιρα αὑτηί , ἐργαζομένη μὲν ἤδη τῷ σώματι , νεωτέρα δὲ οὖσα διὰ τὸ μήπω τὴν ἡλικίαν αὐτῇ παρεῖναι .
59.23ὡς οὖν ἀληθῆ λέγω , ὅτι Νικαρέτης ἦν καὶ ἠκολούθει ἐκείνῃ καὶ ἐμισθάρνει τῷ βουλομένῳ ἀναλίσκειν , τούτων ὑμῖν αὐτὸν τὸν Φιλόστρατον μάρτυρα καλῶ .
Μαρτυρία
Φιλόστρατος Διονυσίου Κολωνῆθεν μαρτυρεῖ εἰδέναι Νέαιραν Νικαρέτης οὖσαν ,ἧσπερ καὶ Μετάνειρα ἐγένετο ,καὶ κατάγεσθαι παρʼ αὑτῷ ,ὅτε εἰς τὰ μυστήρια ἐπεδήμησαν ἐν Κορίνθῳ οἰκοῦσαι ·καταστῆσαι δὲ αὐτὰς ὡς αὑτὸν Λυσίαν τὸν Κεφάλου ,φίλον ὄντα ἑαυτῷ καὶ ἐπιτήδειον .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 59.18 | Dem. 59.22 (English) | >>Dem. 59.25 |
